اهلا وسهلا

بعد لفلفة ما يقارب ثلاثة أو أربعة ساعات من دائرة لدائرة، ومن طابق لطابق، ومن مكتب لمكتب، يدخل المراجع وهو يحتضر ويلملم أنفاسه الأخيرة.
يصل للموظف، ويسأله انت أبو حازم؟، بعثوني الشباب عليك، وهاي المعاملة عندك…!
ابو حازم: آه هاي عندي،( وعينه على المعاملة والعين الثانية على جهاز الكمبيوتر الجديد “بلعب سولتير”….ثم يفرك يديه فوق صوبة الكهربا مع كلمة آآآآح جمودة اليوم)، وبقله “ارجع كمان ساعة”.
المراجع بكل حسرة يخرج من المكتب، لكن فجأة يقرأ اسم ابو حازم، محمد الفلاني،،، وقتها يرتسم على وجهه بسمة أمل …..، وبصوت خفيف يسأل انت محمد الفلاني…؟!!! بكل تعجب
ابو حازم: آه انا هو…!
المراجع: هاي طلعنا نسايب وقرايب ترى،
ابو حازم: اها كيف يعني “بلا زغرة”..؟
المراجع: انا أخت مرتي متزوجة من عيلة الفلاني، يحيى الفلاني، بتعرفه…؟
ابو حازم: (في هذه الحالة ينظر إلى أقصى زاوية في الغرفة، مع هبوط قليل عن الكرسي يرافقه ارتفاع حاجب فوق الآخر مع نفثه من السيجارة على شكل دوائر……، وبصوت مفاجيء)، آآآآه، أيوا هسا تذكرته هذا بكون ابن عمي من ستي خضرة، انا من ستي عطاف……، والله الدنيا صغيرة فعلا، هسا قولي شو تشرب…؟
المراجع: لا والله ولا اشي، بس اذا مصر قهوة وسط، (خلال هذه الفترة، يتم رواية قصة فاتن عندها هروبها مع ابن الجيران يلي بدته على ابن عمها، وحلفان أبو يوسف الطلاق على أم يوسف، وسيجارة مولعة وسيجارة طافية، مع حلفان يمين غير تتغدى اليوم عنا……..)
 
وبعد مرور ساعتين انقضى الموضوع، مع وجود طابع ناقص في المعاملة، والمكتبات مسكرة
 
أبو حازم: خلص تعال بكرة بنكمل الخراف وبكملك المعاملة
 
وبهذا الاسلوب لو حسبنا أنه كل يوم أبو حازم يتعرف على مراجع واحد ويطق معاه حنك، خلال شهر بكون مصاحب 22 شخص، وخلال خدمة 30 عام بكون تعرف على 660 شخص من “نسايبه” بدون ما يعرف، يرافقه 1200 فنجان قهوة “أبو نسب” و660 بكيت دخان
وبهذا تم دعم الاقتصاد المحلي وتقوية الروابط الاجتماعية
 
وجعلها ولا معاملة مشيت

حسـام كراسنـه